Azur TV - 14.12.2017


Nice Matin - 14.12.2017


Inauguracion dau Nissart a "L'Esstra"

12.12.2017

Lo bilhet Nissart es enfin estat inaugurat diluns 11 de decembre a 19 oras a "L'Esstra", restaurant e espiciaria de produchs locals bio! L'inauguracion s'es acompanhada d'un concèrt dau grop de fòlc occitan "Lu Barbalucos".


Region "Occitanie": l'"ADN" d'una vergonha!

Comunicat Oficiau - 07.12.2017

Es amb granda pena e pietat qu'avèm constatat la creacion d'un novèl imne per la region dicha "Occitanie", interpretat per lo promier còp a Narbona lo 30 de novembre passat a l'escasença d'un rescòntre de rugbí.

 

Non contenta d'aver usurpat lo nom "Occitanie" e de l'aver confiscat ai país occitans fòra Lengadòc, la region de Tolosa-Montpelhièr es anada encara mai luenh dins l'abominacion en se dotant d'un imne au títol particularament afrós: "L'ADN Occitan". Coma se l'occitanitat dau pòble foguèsse una question de genetica.

 

E pièger, sei autors, autoproclamats "trobadors dei temps modèrnes" sens paur dau ridicul, an causit d'escriure lei paraulas exclusivament en francés "per qu'aqueste cant siágue un imne dobèrt a totei e tornat devèrs l'avenir".

 

Avèm aquí lo resumit perfiech de la natura de la nòva region dicha "Occitanie": una estructura tecnocratica francesa, centralizada a Tolosa e amb una vision tipicament jacobina de l'identitat occitana reducha au terraire, a l'istòria e au passat. Per ela, l'avenir es lo francés, v'avèm ben comprés: "Se canta lei racinas d'Òc en lenga d'Òil"...

 

La Republica Federala Occitana a totjorn denonciat aquela mascarada promouguda per certans militants occitanistas qu'an pas esitat de traïr seis ideaus per oportunisme politic e per fin de veire lo nom "Occitanie" figurar sus lei mapas, quiti d'exclurre leis autrei país occitans sens consideracion, e mai de pactizar amb lei secessionistas lingüistics antioccitans de Provença que i an vist una oportunitat qu'èra pas d'esperar per legitimar enfin sa vision erronèa de la "pluralitat dei lengas d'Òc".

 

Ara la Republica Federala Occitana es la soleta entitat que pretend representar administrativament tota l'Occitània granda, aquela que va de Mentan a Bordèu, de Lemosin ai Pirenèus, e que lo solet imne legitim es lo "Se Canta", cantat exclusivament en occitan.

 

Au contrari d'una estructura jacobina, centralizada e tornada devèrs París, l'RFÒC propaua la construccion d'un Estat federau que favoriza lo mai la gestion locala. Dins aquesta logica s'es fondada en 2010 la República de Nissa, promiera republica federada, que va inaugurar aqueste mes sa promiera moneda locala "lo Nissart".

 

Dins la dralha d'una construccion d'Occitània granda tròç per tròç, encoratjam la creacion d'autrei republicas occitanas localas.

 

***

 

Prètz, Larguesa e Paratge

 

***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : info@occitania-oc.com 

Site : www.occitania-oc.com


La Republica Federala Occitana condemna la repression estatala espanhòla

Comunicat Oficiau - 02.11.2017

Lo dijòus 2 de novembre de 2017, en plen còr d'Euròpa, la justícia d'un país membre de l'Union Europèa (Espanha) a ordenat l'incarceracion de 9 membres dau Govèrn Catalan, elegits democraticament per lo pòble catalan.

 

La Republica Federala Occitana (RFÒC) condemna vigorosament l'estat espanhòu per aquel acte que jutja particularament indigne d'una democracia e que constituís un atac grèva còntra lei libertats lei mai elementàrias.

 

Per remembrança, es pas lo primier còup que l'estat espanhòu comet una violacion de la libertat d'opinion: lo 16 d'octòbre passat, lei dos presidents d'associacions independentistas Jordi Cuixart (Omnium Cultural) e Jordi Sanchez (ANC) èran plaçats en detencion preventiva per delicte d'opinion. Çò que pòrta a 11 lo nombre de presoniers politics catalans en Espanha.

 

L'RFÒC exigís per consequéncia la liberacion immediata dei membres dau Govèrn Catalan e dei dos Jordi, e demanda a l'Union Europèa qu'intervengue per denonciar e n'acabar emb aquest viratge autoritari adoptat per lo govèrn de Rajoy.

 

La Republica Federala Occitana es solidària dau Govèrn Catalan que vòu bastir la República catalana, democraticament vouguda per la nacion catalana.

 

***

 

Prètz, Larguesa e Paratge

 

***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : info@occitania-oc.com 

Site : www.occitania-oc.com


La Republica Federala Occitana reconeis la Republica Catalana

Comunicat Oficiau - 28.10.2017

La Republica Federala Occitana reconeis la República Catalana.

 

La República de Nissa (federada a la Republica Federala Occitana) espèra que la Val d'Aran (territòri occitan dins la República Catalana) devengue tanben un república federada a la Republica Federala Occitana.

 

Uèi, lo 27 d'octòbre de 2017, lo Parlament Catalan a votat e proclamat l'independéncia de Catalonha sota forma de República, en conformitat amb la volontat dau pòble catalan que s'èra exprimit per una esquichanta majoritat (90%) en favor de l'independéncia mentre lo referendum dau 1r d'octòbre, menat democraticament e regularament maugrat la repression policiera de l'estat espanhòu.

 

La Republica Federala Occitana pren acte d'aquesta proclamacion istorica, tant per Catalonha que per Occitània e Euròpa tota, e reconeis solemnament l'independéncia de Catalonha.

 

De ligaments frairaus e solidaris an totjorn existit entre Catalonha e Occitània. Per remembrança, en Val d'Aran, pichin territòri occitanofòn de la Generalitat de Catalonha, l'occitan aranés a obtengut en lo 1990 l'estatut de lenga oficiala (cas unic dins Occitània tota), estendut a tota la comunautat autonòma en lo 2006 puèi renforçat  per una lei catalana en lo 2010.

Visca Catalunya ! Viva Occitània !

 

***

 

Prètz, Larguesa e Paratge

 

***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : info@occitania-oc.com 

Site : www.occitania-oc.com


Nice Matin - 05.10.2017


Visita de la delegacion de l'RFÒC a Barcelona mentre lo referendum catalan

02.10.2017

Lo 1er d'octòbre de 2017, mentre qu'organizava una manifestacion davant lo Viceconsulat d'Espanha a Nissa, la Republica Federala Occitana mandava tanben a Barcelona una delegacion oficiala, compausada dau Promier Ministre federau Cristòu DAURORE, dau Ministre de l'Economia Felipe BONNET e de l'ambassadritz d'Occitània en Catalonha Assompció AMAT, per fins de sostenir lo referendum sus l'independéncia de Catalonha.


La Republica Federala Occitana a manifestat davant lo Viceconsulat d'Espanha a Nissa

01.10.2017

Encuèi 1er d'octòbre de 2017, la Republica Federala Occitana a organizat una manifestacion davant lo Viceconsulat d'Espanha a Nissa en sosten au referendum sus l'autodeterminacion de Catalonha e en denóncia de la repression policiera que mena l'Estat espanhòu còntra aqueste referendum.

 

Dementre, lo president de la República de Nissa, Cristòu Daurore, es actualament a Barcelona emb d'autres membres dau govèrn per sostenir sus plaça lo referendum !

 

Non a la dictatura neofranquista ! Visca Catalunya !


Direct Matin - 29.09.2017


Manifestacion de sosten au referendum en Catalonha

28.09.2017

Diménegue 1er de setembre de 2017 a 14 oras, la Republica Federala Occitana e la República de Nissa que li es federada organizeràn una amassada davant dau Consulat d'Espanha de Nissa (4, bd Joan Jaurès, a costat de la plaça Garibaldi) per sostenir lo Referendum de Catalunya.


Nice Matin - 28.09.2017


La Republica Federala Occitana sosten lo pòble e lo Govèrn catalans dins sa lucha per l'independéncia !

Comunicat Oficiau - 20.09.2017

  

 

La Republica Federala Occitana (RFÒC) pòrta tot son sosten a Catalonha dins sa lucha per son independéncia !

 

 

 

Actualament, l'Estat espanhòu es a menar una politica repressiva per fin d'empedir lo referendum sus l'independéncia de Catalonha que deu se debanar lo 1r d'octòbre de 2017.

 

L'RFÒC condemna emb vigor lei pressions e intimidacions deis autoritats espanhòlas còntra Catalonha, e denóncia la deriva autoritària dau govèrn madrilenc, a cu demanda exprèssament de respectar lo drech dau pòble catalan de decidir de son avenir, en faguent remembrar que l'autodeterminacion es un principi fondamental reconegut per lo Drech Internacionau.

 

La Republica Federala Occitana entreten despuei totjorn de ligams diplomatics e culturaus fòrts emb Catalonha e còmpta dins son govèrn un ministre catalan (Xavier BADA, ministre de la justícia) e una ambassadritz d'Occitània en Catalonha (Assompció AMAT).

 

De mai, Occitània es fòrça concernida per la situacion de Catalonha vist que lo territòri d'aquela conten una entitat occitana: lo Vau d'Aran. 

 

Viva Catalunya ! Viva Occitània !

 

***

 

Prètz, Larguesa e Paratge

 

***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : rfoccitana@gmail.com 

Site : www.occitania-oc.com