La moneda locala "Nissart" serà utilizada mentre dau Festi'Cant

06.11.2018

La moneda locala "Nissart" porrà èstre utilizada a l'escadença de l'edicion d'auton dau 18n Festi'Cant que si debanerà successivament:

  • Lo dissabta 17 de novembre a 20o30 a L'Escarèa
  • Lo diménegue 18 de novembre a partir de 12o00 a Berra.

La República de Nissa li tendrà un Burèu de cambi dei euros en Nissart.


La moneda locala "Nissart" serà utilizada mentre dau Festi'Cant

10.05.2018

La moneda locala "Nissart" porrà èstre utilizada a l'escadença dau 18n Festi'Cant que si debanerà successivament:

  • Lo divendres 11 de mai a 19o30 a la sala de la Sosta (3502 Bolevard de la Valada) a Pelhon
  • Lo dissabta 12 de mai a 20o30 au Teatre de l'Eliça (150 Rota de Casternòu-Vilavièlha) a Conte.

La República de Nissa li tendrà un Burèu de cambi dei euros en Nissart.


La moneda locala "Nissart" serà utilizada a la 4a Jornada Nissarda

10.04.2018

La moneda locala "Nissart" editada da la República de Nissa serà utilizada a l'escadença de la 4a Jornada Nissarda organizada da l'associacion de danças folcloriqui nissardi "Nice la Belle".

Entre doi concèrts, balètis e animacions programadi, vos porretz passejar a l'entorn dei bancs de vendas de mèrç, de manjuca e de beguda, dont porretz pagar en "Nissarts".

 

La 4a Jornada Nissarda si debanerà lo dissabta 14 d'abriu a comptar de 12 oras mentre tot lo predinar, a la Maion Francina Gag situada au 20 Avenguda Frederic Mistral.


Occitània amb Mirèlha Bòia!

14.02.2018


La Republica Federala Occitana sosten Mirèlha Bòia!

Comunicat Oficiau - 13.02.2018

La Republica Federala Occitana pòrta tot son sosten a Mirèlha Bòia (Mireia Boya), femna occitana aranesa ex-deputada dau Parlament Catalan, victima de la repression de l'Estat espanhòu !

 

Per aver defendut pacificament e democraticament, dau temps de son mandat de deputada (de 2015 a 2017), la creacion d'una Republica Catalana independenta dins la quala la Vau d'Aran seria associada e respectada, Mirèlha Bòia es enseguida per la justícia espanhòla per "rebellion" e mai es victima de faussi rumors e calomnias tocant un mas rural que ten amb son fraire.

 

Dementre, lo Tribunal Constitucional espanhòu a decidit de fòrabandir l'usatge "preferenciau" de l'occitan aranés dins leis institucions e administracions d'Aran. La Republica Federala Occitana denóncia çò que qualifica d'atac grèu contra la lenga occitana e totei leis avançadas obtengudas despuei un trentenat d'annadas (estatut de mieg-autonomia d'Aran en 1990, Lei de l'occitan en 2010).

 

En respòsta ai atacs antioccitans de l'Estat espanhòu e ai menaças d'empresonament de Mirèlha Bòia, la Republica Federala Occitana se jonhe ai signataires dau Manifèst de sosten a Mirèlha Bòia, presentat çai-sota:

 

"La deputada aranesa al Parlament de Catalonha, Mirèlha Bòia (Mireia Boya), serà menada davant la justícia espanhòla per “rebellion” pr’amor de sa participacion politica al referendum que se tenguèt lo 1r d’octòbre passat.

 

Lo jutge del Tribunal Suprèm espanhòl, Pablo Llarena, l’a apelada pel 14 de febrièr.

 

Bòia serà seguida puèi d’Anna Gabriel, tanben èx-deputada de la CUP e mesa en examen pel meteis “delicte”.

 

Lo jutge Llarena decidiguèt lo 22 de decembre passat d’alargar l’enseguida contra Mirèlha Bòia, e mai contra d’autras responsablas politicas catalanas coma Anna Gabriel, Marta Pascal o encara Marta Rovira.

 

Las practicas politicas de l’estat espanhòl nos semblan vengudas d’un autre temps, d’un temps que fòrça gents l’avián cregut passat, e nos remembran las piègers oras de l’istòria en Catalonha tant coma en Espanha: la criminalizacion e la repression judiciària d’una partida de la classa politica catalana per sas opinions politicas, l’empresonament de lidèrs de partits e d’associacions ciutadanas, l’exili d’un president de govèrn... Tot aquò manten un sentiment d’arbitrarietat e d’injustícia, al bèl mièg d’una Union Europèa que se targa d’èsser un modèl de liberalisme e de pluralisme politic dins lo Mond.

 

Nosautres, ciutadanas e ciutadans de l’Union Europèa, occitanas e occitans, declaram nòstre sosten total a Mirèlha Bòia.

 

Sostenèm Mirèlha Bòia per aver representat al Parlament catalan, entre 2015 e 2017, amb dignitat istorica, la votz d’Occitània; o faguèt en rendent possible que, pel primièr còp dins l’istòria dels estats modèrnes europèus, la lenga occitana ganhèsse una visibilitat publica e politica, dins lo quadre del procès per lo bastiment de la Republica de Catalonha, çò que representa un fenomèn d’una portada politica incomparabla amb la situacion desastrosa de la lenga d’òc dins son territòri istoric majoritari, dins la Republica Francesa.

 

Sostenèm Mirèlha Bòia, dont lo quite nom es portaire de tota una esperança per las femnas e los òmes d’òc, fàcia a las practicas policièras e arbitràrias d’un estat dont las garentidas democraticas cada jorn van mai a la deriva.

 

Entre las primièras organizacions signatàrias:

 

Accion Culturala Occitana

Associacion entara difusion d’Occitània en Catalonha (ADÒC)

Cercle d’Afrairament Occitanocatalan (CAÒC)

Chambra d’Òc

Corròp per Aran

Òc Malhòrca

Assemblada Nacionala Occitana (ANÒC)

Partit de la Nacion Occitana (PNO)

Republica Federala Occitana

Republica de Niça [República de Nissa]

País Nòstre

 

Tota organizacion e tot individú pòdon signar aqueste manifèst en escrivent a Accion Culturala Occitana (acc.culturoc@gmail.com) o ben als mèdias Jornalet (info@jornalet.com) e Aquò d’Aquí (aquodaqui@aquodaqui.info)."

 

***

 

Prètz, Larguesa e Paratge

 

***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : info@occitania-oc.com

Site : www.occitania-oc.com


Azur TV - 30.01.2018


Nice Matin - 29.01.2018


La moneda locala "Nissart" es de retorn per 11 mes

28.01.2018

 

A partir dau diluns 29 de genoier dau 2018, la moneda locala "lo Nissart" es de retorn per una novèla operacion d'11 mes que durerà fins au 31 de decembre.

 

 

Lu bilhets seràn en servici e si porràn utilizar da 20 partenaris.

 

Lo burèu d'escambi dei bilhets si tròba a la fornaria bio Mamà Baker, situada au 13 Carriera Lepanta. Lo servici serà assegurat da Miqueu RAINERO cada jorn de 9o30 a 11o30 e de 14o30 fins a 17 oras. Lu bilhets seràn valables fins au 31 de decembre.

 

Lu bilhets de Nissarts si declinan en sèt valors diferenti, caduna emb l'efigia d'un personatge istoric de Nissa.

 

Li serà una paritat entre lo Nissart e l'euro, li pèças de centims d'euro serveràn finda a la moneda locala. Si pòu cambiar lu euros en Nissarts, mas non si poadon cambiar lu Nissarts en euros (levat per lu partenaris). Aquela moneda es facha per èstre despensada dai partenaris.

 

Lu comerçants, artisans e associacions participanti s'engatjeràn a respectar la Carta dau Nissart.


Vots de Novèl An dau president de la Republica Federala Occitana

Comunicat Oficiau - 01.01.2018

Caras ciutadanas, cars ciutadans,

 

Vos presenti mei melhors vots per l’An Nòu 2018 en tant que president de la Republica Federala Occitana.

 

Nos pertocant, l’eveniment mai simbolic sarà estat ben segur lo processús d’independéncia de Catalonha, una vièlha nacion frairala de la nòstra qu’es a mena una lucha, non acabada, per son drech a l’autodeterminacion. Una republica nòva que compren un tròç d’Occitània: lo Vau d’Aran.

 

La situacion en Catalonha nos a fach comprendre que la pression deis imperialismes d’Estats pretendudament nacionaus, demòra fòrta e que lei pòbles en lucha auràn un combat lòng de menar per poder decidir de lor avenir.

 

La Republica Federala Occitana quita l’annada 2017 emb una vision plena d’espèr e d’avenir, gràcia a una promiera experiéncia fòrça encoratjanta: lo succès de la moneda “Nissart” difusada per la República de Nissa. Aqueu succès permetarà la realizacion d’autreis operacions mai lòngas per lo 2018.

 

En despart de la moneda, la novèla annada sarà marcada au nivèu locau per l’organizacion de la votacion per elegir un novèu president per la República de Nissa.

 

Au nivèu federau, la bastison institucionala de l’RFÒC va contunhar amb l’instauracion d’una futura assemblada constituanta e populara per redigir la futura Constitucion. De mai, es previst una sèria de mesuras per establir enfin una vertadiera ciutadanetat occitana.

 

Coma tota entitat estatala, la Republica Federala Occitana es una realitat institucionala propausada au pòble. De mai ara es la soleta entitat que representa politicament e administrativament Occitània tota, despuei qu’es estat atribuit a la region de Tolosa-Montpelhièr lo nom “Occitanie”.

 

Au contrari d’aquela region, l’RFÒC entend representar totei leis occitanas e occitans que siágan, i includent aquelei dei regions demoradas fòra de l’Occitània reducha a Tolosa-Montpelhièr.

 

La legitimitat de nòstra republica repausa sus lei votacions de sei presidents. Elegit en 2014 au sufratgi universau per la majoritat dei vòts exprimits dei ciutadanas e ciutadans occitans, siáu fòrça onorat de vos representar a travèrs de la Republica Federala Occitana per la quala me siáu engatjat.

 

Vos auguri un bòn e urós Cap d’An 2018.

 

Ciril JOANIN

President de la Republica Federala Occitana

 

***

 

Prètz, Larguesa e Paratge

 

***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : info@occitania-oc.com 

Site : www.occitania-oc.com


Eleccions dau Parlament de Catalonha dau 21D: victòria dei independentistas!

Comunicat Oficiau - 22.12.2017

La Republica Federala Occitana saluda la victòria dei partits independentistas catalans ais eleccions dau Parlament dau 21 de decembre.

 

Una victòria importanta emb un taus de participacion recòrdi maugrat la propaganda mediatica e la pression policiera de l'estat espanhòu que manten en preson d'un biais arbitrari lo cap de l'Esquèrra Republicana de Catalonha (ERC) Oriol Junqueras e lei presidents d'Òmnium e de l'ANC (Jordi Cuixart e Jordi Sánchez).

 

La votz dau pòble catalan s'es exprimida en rendent la legitimitat au govèrn catalan caçat per la lei 155 de la Constitution espagnole, e en faguent comprendre que la majoritat silenciosa dei catalans èra pas unionista. L'RFÒC espèra qu'aqueu resultat permetarà la restauracion de la democracia e dau drech dau pòbla catalan de decidir de son avenir.

 

***

 

Prètz, Larguesa e Paratge

 

***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : info@occitania-oc.com 

Site : www.occitania-oc.com


Cultura Viva - 21.12.2017