Resultats de la votacion dau president dau Segond Govèrn Provisòri de la República Federala e Democràtica dei País d'Òc


21/09/2009

Al monde, als electors, als candidats Joan-Luc Labòrda e Cristòl Daurore, als membres dal GPO 1 e dal GPO 2 a venir,

 

Mercés de la voastra participacion.

 

Las tendenças qu'èran visiblas, son confirmaas aüra, Cristòl ven d'èstre elegit a una larga majoritat. Felicitacions a el ! Los amics an respondut a l'apèl de la votacion, es ben. Porretz legir lo rapoart de Miquel Aguilera, delegat a las eleccions de la RFDOc, sus los vòtes daval. Lo poem rengraciar per lo -gròs- trabalh d'assessor a las eleccions que faguèt.

 

Al nom dal Govern dal GPO 1 que va s'acabar, remplaçat per l'equipa nomenaa da Cristòl, vos felicito totes dos per aver permés, -gràcia a voastras candidaturas a la presidença- al monde de CAUSIR e de VOTAR democraticament, per un president dal GPO. Es estach un moment important dins noastra istòria, de GPO e de Païses d’Oc.

 

L'interim entra las doàs equipas serà assegurat per lo GPO 1.

 

Lo grop “Facebook GPO”, lo GPO a recebut lo sosten nominatiu de 56 personas. Es un boan camin !

 

Coralament,

 

Lo passat 1er ministre dal GPO 1 (non candidat),

Observator per las eleccions presidencialas dal GPO 2.

 

Lo passat President dal GPO 1 (non candidat),

accessor a las eleccions presidencialas dal GPO 2.

____________________________

 

Vaicí lo resultat de la votacion (vòts per Internet) per la designacion dau noveu president de la Republica Federala e Democratica dei Païses d'Oc.

 

L'escrutin es barrat dempuèi ièr a miejanuèch. Cada elector qu'a precisat son nom, pichon nom e adreiça a recebut una atestacion de vòt.

 

Nombre de votants : 800

 

Aqueste resultat se compausa ansin :

 

Cristòu DAURORE  ............................... 641 votz ( 80,13 %)

 

Joan-Luci LABORDE ........................... 147 votz (18,38 %)

 

Abstencions........................................... 10 votx (1,25 %)

 

Nuls........................................................ 2 votx (0,24 %)

 

 

Cristòu DAURORE es declarat vencèire d'aquesta consultacion.

 

Ara, dèu causir un(a) premier Ministre lo quau, o la quala, presentarà un noveu GPO amb l'acòrd dau noveu president elegit.

 

Aquesta procedura es confòrma a la Plataforma de Narbona, tèxtes fondators de la Republica Federala e Democratica dei Païses d'Oc, redigida per Miqueu Aguilera e Joan-Luci Labòrde amb li membres dau premier GPO.

 

Lo 26 de setembre a Nissa aurà luòc la proclamacion de son eleccion, e l'anòncia de la constitucion dau noveu Govèrn Provisòri Occitan.

 

Amb toti mas felicitacions ai dos candidats. E viva Cristòu DAURORE, nòstre noveu President !

 

 

Miqueu Aguilera,

Delegat ai votacions de la RFDOc


Profession de fe de Cristòu DAURORE

2009

Adieu Dònas e Sénhers,

 

Siéu candidat au poast de president dau GPÒc.

 

Mi soani Cristòu Daurore, estau a Nissa, siéu lo director dau Centre Culturau Occitan País Nissart. Ensenhi l'occitan au colègi, a la materna, en lu centres culturaus.

 

Mi pensi que lo GPÒc pòu mostrar ai Occitans que si podèm governar emé una estructura independenta, far la propoasta d'un autre modèl politic mai respectuós dei minoritats, una economia mai solidària, una mai boana gestion dau noastre espaci ...

 

Podèm mostrar coma porria èstre Occitània se siguesse independenta.

 

Lu Catalans son en avança, n'en moastron lo camin, seràn a Brusselas dau 7 au 9 de març per demandar l'independença de Catalonha.

 

Aquò moastra que l'independença es pus un pantai !

 

Siéu pacifista e mi pensi qu'es important de mostrar au pòple occitan qu'un autre camin es possible, avèm da besonh de l'educar.

 

Encuèi França es la referença de la majoritat dei Occitans, a nautres de crear la referença Occitània.

 

Se siam logics, aquelu que voalon la nacionalitat occitana dèvon demandar la sieu carta d'identitat au PNÒc, aquò vòu dire que porriavam organisar de votacions presidenciali au sufratge universal emé aquelu qu'an la carta d'identitat.

 

A Nissa, venèm de crear la noastra ràdio (100 % en òc) sensa ajuda dei estructuras de l'Estat francés.

 

Tot aquò es una istòria de volontat, aquelu que criticon farion ben de far d'autri propoastras, quora veèm que l'Estat francés dona que de sobrias per lu Occitans.

 

Per Occitània liura e independenta !

 

 

Visat dau candidat, Cristòu Daurore


Profession de fe de Joan-Luc LABORDA

2009

* Occitania deb monstrar ua cara unica e unida davans l'estranger, en particulier, ua candidatura unica per tots los partits politics occitans per las elecions a la França e a l'Europa => cauria organizar de primeras.

 

* Demora un tribalh important de har per las estructuras legislativas e judiciaras d'occitania, lo Pdt deb pas esser un membre deth govern mes deb esser lo garant de l'independança de la justicia e deth parlament.

 

* I aura de elecions a organizar per elire las cambras legislativas e las cors de justiça, adonc cau precisar la citajanatat occitana, e organizar l'autentificacion deths vòuts sus internet (sonque un problema tecnic) per en decreisser los costs.

 

* Per las estructuras politicas, l'occitania es ua republica federala. Lo poder deb demorar au pòble e a las estructuras localas. L'estructura d'ua federacion es piramidala, cau i aver ua cambra deth deputats que sera elegida au sufratge universau direct per lo pòble, e cau i aver ua cambra deths paises que los representants seron elegits per l'amassada legislativa de cad pais. D'un mesme biais deb i aver los governs locaus, las cambras legislativas localas e las cors de justiça localas. Tot acò es un tribalh enòrm e que deb esser organizat en partant de la baisa.

 

* Com Occitania deb monstrar ua cara unida davns l'estranger, las ahars estrangeras seron ua competança partajada entre lo govern, lo legislatiu e lo judiciar.

 

Se soi elegit, seri un president virtuau, cap d'amassadas, mes utilizari lo web per partajar lo tribalh que cau har e com dab aquesta estructura lo pòder presidenciau serà mei gran, pòdera esser remés en causa tots los ans.

 

Visat deth candidat, Joan-Luc Labòrda