Diada de Catalunya: la Republica Federala Occitana sosten Catalonha  [Comunicat Oficiau]

09.09.2016

 

La Republica Federala Occitana manifesta son sosten a Catalunya a l'escasença de sa Fèsta Nacionala de Catalonha, la Diada de Catalunya, que se debanarà lo diménegue 11 de setembre a Barcelona e dins Catalonha tota.

 

 

La Republica Federala Occitana e la República de Nissa que i es federada rendon gràcia au Govèrn de Catalunya per l'estatut de co-oficialitat qu'a acordat a l'occitan dins lo Val d'Aran e tamben per lo restabliment dau Govèrn d'Aran en lo 1990.

 

Tenèm en aquesto títol de vos far part de tot nòstre sosten tocant la situacion de Catalonha Nòrd dins la nòva region dicha "Occitanie". Comprenèm perfiechament nòstrei fraires nòrd-catalans dins sa volontat d'èstre reconeguts dins lo nom de la dicha region e sostenèm sens reserva sa revendicacion, perqué siam foncierament estacats au drech dei pòbles de chausir son pròpre camin e finda l'amistat millenària que liga nòstrei dos nacions catalana e occitana.

 

Siam sincerament desolats per la situacion injusta que subisson lei nòrd-catalans

en causa d'una decision tecnocratica totalament en defòra de nòstra volontat.

 

Lo 6 de novembre dau 2007, lo promier Govèrn de la Republica Federala Occitana èra recebut au Parlament de Catalunya. Sèt ans après, la Republica Federala Occitana inaugurèt l'Ambassada d'Occitània en Catalunya lo 10 de novembre dau 2014 a Barcelona.

 

L'ambassadritz d'Occitània en Catalunya s'apela Assompció AMAT. E lo ministre de la Justícia de la RFOC es Xavier BADA, ancian deputat catalan dau CiU, en foncion despuèi la creacion de la Republica Federala Occitana (lo 24 de març dau 2007).

 

Aqueleis accions son per sostenir l'independéncia de Catalunya e dau 1er tròç d'Occitània: lo Val d'Aran.

 

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : rfoccitana@gmail.com 

Site : www.occitania-oc.com


La República de Nissa convida a una minuta de silenci en omatge ai liberators de Nissa [Comunicat Oficial]

26.08.2016

 

La República de Nissa e la República Federala Occitana rendràn un omatge ai fremas e òmes qu'an participat a la Liberacion de Nissa de l'ocupacion nazia lo 28 d'aost dau 1944, sigue 72 ans fa.

 

 

Si pensam qu'es important de tenir a ment aquelu qu'an augut lo coratge de si pilhar en man sensa asperar l'armada dei aligats.

 

32 d'aquelu li an perdut la vida aqueu jorn e il èra mai de 280 ferrits. En aquesti victimas cau ajónher lu bombardaments aligats dau 26 de mai, lu penduts Torrin e Grassi lo 7 de julhet, lu fusilhats de l'Ariana lu 22 de julhet e 15 d'aost eca.

 

Lo president República de Nissa, Cristòu DAURORE, e lo president de la Republica Federala Occitana, Ciril JOANIN, vi convidan da observar en lo sieu omatge una minuta de silenci aqueu diménegue 28 d'aost a miejorn.

 

La Republica Federala Occitana si jonhe finda en aquest omatge a Nissa. Lu sieus rapresentants si son desplaçats a Tula lo 31 de julhet dau 2014 per fin d'onorar li 99 victimas pendudi dai nazis. Lo 1er d'aost dau 2014, lo cònsol d'Orador de Glana (rapresentat dau conselher municipal Sénher Miqueu Pailler) a vorgut si ligar au noastre omatge en lemosin ai 642 victimas dei nazis. E fin finala lo 17 d'aost dau 2014 a Tolon, un omatge siguèt rendut au desbarcament dei chormas aligadi.

 

Cristòu DAURORE, president

Jòrgi GRILLI, 1er ministre

 

 ***

  

REPUBLICA DE NISSA

6 Avenguda Gautier-Roux

OC – 06000 NISSA

Tel.: +33 (0)6 71 18 61 21

E-mail : occitania@nissa.org

Site : www.occitania-oc.com



La Republica Federala Occitana es en dòl e rend omenatge ai victimas de l'atemptat de Nissa [Comunicat Oficiau]

15.07.2016

Es emb consternacion e espavent qu'avèm assistit a un acte de barbariá inumana, ièr lo 14 de julhet au sera, a Nissa, la nòstra Bèla Nissa. Un camion fòl s'es dirigit vèrs la foga amassada sus lo Camin deis Anglés, especialament per renversar lei gents e far lo mai de victimas possiblas. Es un acte terrorista contra lo pòble pacific de Nissa.

 

La Republica Federala Occitana es completament atristada, endolada, murtrida per aquest acte terrorista qu'a fach de desenats de mòrts e mai d'una centenat de ferits.

 

Lo terrorisme es una inhominiá, una abominacion e cresèm mai que mai que la libertat, la democracia e la justícia, que son nòstrei valors, lei valors de l'umanitat, ganharàn contra leis ideologias mortifèras d'òdi, de fanatisme, d'integrisme de tota mena que son condemnadas de finir dins lei rementas de l'istòria e de l'umanitat.

 

Dins l'immediat, la RFÒC es en dòl, e exprimís tota sa compassion a totei lei familhas dei victimas.

 

Nissa demorarà totjorn granda, fòrta, liura, fièra e bèla. Viva Nissa !

 

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : rfoccitana@gmail.com 

Site : www.occitania-oc.com


Omatges de la República de Nissa ai victimas de l'atemptat de Nissa [Comunicat Oficial]

15.07.2016

Es una Catastròfa Nacionala que cala sus de la capitala de la República de Nissa!

 

L'amplessa dau carnatge es sensa precedent per Nissa, en aquest ora 73 moarts e mai d'un centenau de ferrits.

 

Non conoissèm encara li rasons qu'an motivat aquest òme per rotlar lèu sus de la fòga emé lo sieu camion sus dau Camin dei Inglés.

 

 

Compatissèm au dolor dei familhas dei victimas e li asseguram lo sosten dau pòble de Nissa.

 

Cristòu DAURORE, president

Jòrgi GRILLI, 1er ministre

 

 ***

  

REPUBLICA DE NISSA

6 Avenguda Gautier-Roux

OC – 06000 NISSA

Tel.: +33 (0)6 71 18 61 21

E-mail : occitania@nissa.org

Site : www.occitania-oc.com



Reinat ANFOSSO, l'ancian ministre de la cultura e deis arts de la RFÒC, es mòrt [Comunicat Oficiau]

06.04.2016

La Republica Federala Occitana es en dòl despuèi que lo regretat Reinat-Pèire ANFOSSO dich "La Sciença" s'es estenhut lo diluns 4 d'abriu dau 2016.

 

"Sciença" foguèt mai de 6 ans (de 2011 a 2015) ministre de la cultura e deis arts de nòstre govèrn, periòd dins lo quau s'illustrèt per sa granda devocion, sa disponibilitat e sa generositat totjorn desinteressada.

 

Au nom de la Republica Federala Occitana, saludam la memòria d'aqueu grand defensor, promotor e amorós de la lenga e la cultura occitanas dins lo País de Nissa. E partejam tamben la dolor de sa familha e sei pròches amics a cu adreiçam totei nòstrei condoleanças.

 

Memòria eternala a nòstre amic Reinat-Pèire ANFOSSO dich "La Sciença".

 

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : rfoccitana@gmail.com 

Site : www.occitania-oc.com


La República de Nissa reagisse a l'expulsion dei Venturino sus la Plana de Var [Comunicat Oficial]

26.02.2016

 

 

La República de Nissa, finda s'es basta simbolica, ten da afortir la sieu oposicion a l'expulsion de la familha Venturino e au prefondament dei sieus maion e jardin en la Plana de Var.

 

 

Ensin, aqueu drama uman moastra una política pròpi marrida : lo betonatge gigantàs de la mai grana plana agricòla e que dona da manjar a Nissa.

 

Per lo respecte de l'environament e lo ben èstre uman, es pus ben de si manjar d'aquí e de qualitat.

 

De mai, la creacion d'aquesta via d'accès a l'estadi non es vorguda dai suportaires.

 

Sto sera lo brameràn !

 

Enfin, lo pòble de Nissa siguèt jamai consultat sus de l'ensems dei projectes de la Plana de Var.

 

Es negar la democracia !

 

Nissardament voastre.

 

Cristòu Daurore, president

Jòrgi Grilli, 1er ministre

 

 ***

  

REPUBLICA DE NISSA

6 Avenguda Gautier-Roux

OC – 06000 NISSA

Tel.: +33 (0)6 71 18 61 21

E-mail : occitania@nissa.org

Site : www.occitania-oc.com



Vots de Novèl An dau President de la Republica Federala Occitana [Comunicat Oficiau]

01.01.2016

 

Caras ciutadanas, cars ciutadans,

 

Siáu fòrça onorat de vos presentar mei melhors vots per l’An Nòu 2016, en tant que president de la Republica Federala Occitana, après un promier an de mandat.

 

Uèi, quitam una annada 2015 plena de guèrras e de tragedias qu’an ensanguinolat lo mond. Pòdi pas m’empedir de pensar ai atemptats de París, contra la redaccion de Charlie Hebdo en genier, puèi dins lei carrieras de la capitala de l’Estat francés ansin que dins la sala dau Bataclan en novembre passat.

 

Pòdi pas oblidar tanben leis autrei guèrras e atemptats qu’an tuat tant de mond au Curdistan, en Egipte, en Irac, au Quènia, au Nigèria, en Siria, en Tunisia, en Ucraïna, eca. La lista es tròp lònga e pregui de mi perdonar de non aver citar leis autrei cas. Pasmens, en aquesta escasença, vòli far part de tota ma compassion ai miliers de familhas de victimas d’aquelei cruelas tragedias.

 

L’annada 2015 èra tanben aquela de la lucha dei pòbles. Aquela de la resisténcia curda contra la barbaria de l’Estat Islamic. Aquela de la lucha dau pòble catalan per l’emancipacion contra l’imperialisme de l’Estat espanhòu. Aquela dau revelh de la nacion còrsa a l’issuda dei darrieras votacions regionalas qu’an vist la victòria electorala dei nacionalistas.

 

L’An 2015 èra tanben aqueu dau començament d’una novèla èra per Occitània tota, amb la perspectiva d’union de totei sei fòrças vivas dins un projècte extraordinari que permetarà a tèrme d’obtenir totei leis autís necessaris per l’emancipacion de la nacion occitana !

 

A-n-aquest títol, l’An 2016 es un espèr per totei. Un espèr per nosautreis occitans que si trobam sus lo bòn camin per un avenidor melhor. Un espèr per nòstreis amics catalans qu’an entamenat dempuèi lo 27 de setembre passat un camin istoric devèrs son independéncia.

 

Un espèr per nòstreis amics còrses qu’an mostrat l’exemple ais autrei pòbles que l’ultra-nacionalisme francés, defendut per de partits que preconizan l’òdi e l’exclusion, es pas una fatalitat, e qu’es possible de tornar prendre en man lo contraròtle de sa pròpria sobeiranetat maugrat la pression de l’Estat francés jacobin que fa tot per destrúger lei nacions minorizadas, coma l’anullacion per lo Senat de la ratificacion de la Carta dei Lengas Regionalas e Minoritàrias.

 

D’un biais mai tragic, un espèr per lei curds qu’an mostrat qu’es possible de resistir victoriosament a la barbaria de Daesh sus dau terren, ansin qu’a-n-aquela de l’Estat turc.

 

Tocant la Republica Federala Occitana qu’ai l’onor de dirigir despuèi un an gràcia a la fisança que m’a acordat la majoritat d’aquelei qu’an participat a la votacion presidenciala dau 2014, l’An 2015 èra tanben ric en accions e eveniments, preludis a de grandas perspectivas futuras.

 

A l’escala locala, la República de Nissa, federada a la Republica Federala Occitana, a presentat sa futura moneda locala, lo “Nissart”, que sarà enfin estampada e mesa en circulacion l’an que ven.

 

En lo 2016, de grandas reformas estructuralas saràn realizadas, que rendràn encara mai solid lo foncionament de nòstreis institucions.

 

D’autrei republicas localas van nàisser sus lo modèl d’aquela de Nissa. Lei representacions internacionalas van se desvolopar, coma la cooperacion amb d’autrei govèrns provisòris. Nòstra visibilitat sarà mai manifesta e eficaça.

 

Toteis aquelei rasons nos fan esperar un avenidor melhor per nòstra Republica e per lei pòbles en lucha. Lo camin sarà encara lòng, mas es lo bòn camin. Volèm tornar trobar nòstra sobeiranetat, dins la patz, la convivéncia, la solidaritat, la justícia sociala, l’economia equitabla e mestrejada.

 

Caras ciutadanas, cars ciutadans, vos auguri un excelent Cap d’An 2016 !

 

Ciril JOANIN

President de la Republica Federala Occitana

  

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

E-mail : rfoccitana@gmail.com

Site : www.occitania-oc.com