La Republica Federala Occitana apela a participar a la manifestacion "Anem-Òc per la lenga occitana" a Montpelhièr lo 24 d'octòbre que ven [Comunicat Oficiau]

22.10.2015

 

A l'escasença de la manifestacion "Anem Òc ! Per la lenga occitana !" organizada per la "Coordinacion per la Lenga Occitana", la Republica Federala Occitana apela totei lei ciutadans d'Occitània (mai de 16 millions d'estatjants) a se recampar lo 24 d'octòbre 2015 a 14 oras a l'Esplanada De Gaulle a Montpelhièr, per demandar l'egalitat de tractament de la lenga occitana a respècte dau francés !

 

Aquò fa de sègles que l'Estat francés mena una politica de repression linguistica a l'encontra dei lengas minorizadas dichas regionalas, de que l'occitan. N'i a pron dau mesprètz estatau per nòstra lenga, nòstra cultura !

 

Volèm aver la possibilitat de se prendre en man per viure coma o entendèm !

 

Que nòstra lenga siágue enfin reconeguda, ensenhada e dignament representada dins la vida publica !

 

Volèm que lei regions benefician d'un vertadier poder local e autonòme !

 

Volèm una economia sobeirana emancipada dau centralisme de la metropòli e dei grands grops imobiliers poirits que betuman sens arrèst nòstrei vilas, nòstrei païsatges e nòstrei litoraus, e que lei sotamèton a la menaça perpetuala dei intempariás coma aquò foguèt lo cas darrierament dins lo País Nissart !

 

Aquesta manifestacion es una escasença extraordinària de mostrar que siam mai que mai mobilizats per obtenir nòstre drech de viure coma o entendèm e que nòstra lenga e nòstra cultura retròban lor dignetat !

 

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


La Republica Federala Occitana onora la Diada Nacional Catalana [Comunicat Oficiau]

11.09.2015

 

A l'escasença de la "Diada Nacional de Catalunya", fèsta nacionala catalana que se debana cada an lo 11 de setembre, la Republica Federala Occitana adreiça totei sei melhors vots, son sosten e sa solidaritat ai catalans, pòble frairal deis occitans.

 

Aquest an serà vertadierament istoric per Catalonha vist que lo 27 de setembre que ven sarà organizada una votacion regionala anticipada que permetariá a la Generalitat de Catalunya de s'emancipar de l'egemonia espanhòla se lei partits independentistas venguèsson a ganhan l'escrutin.

 

Se per cas leis independantistas catalans rempòrtan una victòria electorala, la Republica Federala Occitana festejarà l'evenement l'endeman a l'escasença de la Commemoracion de la Dedicion de Nissa a Savòia, organizada en aqueste jorn per la República de Nissa, e que se debanarà lo diluns 28 de setembre a 7 oras de sera plaça dei Barbets (ex-plaça Massena).

 

La Republica Federala Occitana afortisse mai que mai son sosten au drech dei catalans a l'autodeterminacion per un estat liure, independent e democratic.

 

***

  

Prètz, Larguesa e Paratge

 

 ***

 

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


La revista "Nice Expression" insolenta lu Barbets ! [Comunicat Oficial de la República de Nissa]

08.09.2015

La revista "Nice Expression" a publicat un article sus dei Barbets que qualifica de "contra-revolucionaris" e de "bandits" (edicion n°45, tirada à 250.000 exemplaris). Es una totala mancança de respecte devèrs dei Barbets, patriòtas nissarts que resistèron coratjoament a l'ocupant francés, jacobin pi napoleonian, responsable d'un molonàs de crimis e d'atrocitats contra de la populacion civila de la Comtea.

 

Aquest article nen moastra que cau sempre resistir contra de la desinformacion istorica que pròva de n'ensenha l'Estat francés. Es una lucha de cada jorn.

 

Dins la logica d'aquesta lucha per la reabilitacion dei noastres eròis istorics, es finda l'escadença de far remembrar que l'an passat, la República de Nissa a oficialament cambiat lo nom de la Plaça Massena (dau nom dau traïdor e collabo Massena que servèt dins l'armada d'ocupacion francesa) en Plaça dei Barbets.

 

Ensin, cari ciutadani e cars ciutadans de Nissa, vi convidam e v'encoratjam a espandir aquela informacion dapertot e a toti li gents a l'entorn de vautres per que toi lu nissarts nomenan l'anciana plaça Massena "PLAÇA DEI BARBETS".

 

La resisténcia a la falsificacion de l'Istòria entamenada da l'Estat francés comença per d'actes simbolics d'aquela mena.

 

 ***

  

REPUBLICA DE NISSA

6 Avenguda Gautier-Roux

OC – 06000 NISSA

Tel.: +33 (0)6 71 18 61 21

Corriel : occitania@nissa.org

Site : www.occitania-oc.com



La Republica Federala Occitana celebra lo bicentenari de la batèsta de Waterloo [Comunicat Oficiau]

18.06.2015

La Republica Federala Occitana celebra en aqueste jorn dau 18 de junh dau 2015 lo bicentenari de la batèsta de Waterloo que marca la victòria definitiva de la coalicion europèa contra l'Empèri francés de Napoleon Ier.

 

Saludam en aquesta escasença la memòria deis occitans que luchèron contra l'armada francesa, en promier luec lei Barbets que resistissèron coratjosament contra l'armada d'ocupacion francesa, autor de nombrosas atrocitats contra leis estatjants de la Comtea de Nissa. En segond luec lo bearnés Joan Batista Bernadòta, ancian marescal de Napoleon Ier, devengut rei de Suècia en lo 1811 e un dei coalisats contra l'Empèri francés.

 

Glòria ai eròis qu'an luchat contra de l'imperialisme francés !

  

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


La Republica Federala Occitana protesta contra lo projècte de region "Occitanie" [Comunicat Oficiau]

11.06.2015

 

La Republica Federala Occitana manifesta sa completa desaprobacion contra la proposicion de nomenar "Occitània" la nòva region eissuda de la fusion de Lengadòc-Rosselhon e Miègjorn-Pirenèus.

 

Aquela idèa absurda, sostenguda per quauquei movements occitanistas, es en totala contradiccion amb lei principes fondamentaus de l'occitanisme !

 

Occitània es l'union de totei lei províncias de lenga occitana ! E non pas una entitat administrativa limitada eiretada d'un descopatge jacobin arbitrari e sens coeréncia !

 

Occitània s'espandís de Mentan a Bordèu e de Lemosin au Vau d'Aran ! E non pas au solet Lengadòc amb un tròç de Gasconha a l'oèst, un tròç de Guiana au nòrd e un tròç de Provença a l'èst !

 

Occitània es federala e decentralizada ! E non pas centralizada a l'entorn de la metropòli tolosana, coma sus lo modèl jacobin ! 

 

Occitània a pas la pretencion d'includre e d'administrar la region de Perpinyà (Catalunya Nord) istoricament tornada devèrs Barcelona !

 

NON A UNA OCCITÀNIA REDUCHA AU SOLET LENGADÒC !!!

  

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


La Republica Federala Occitana commemorarà la Fèsta Nacionala Occitana lo 17 de junh que ven [Comunicat Oficiau]

02.06.2015

 

La Republica Federala Occitana celebrarà lo dimècres 17 de junh a 19o30 la Fèsta Nacionala Occitana, amb un amassada sus la plaça dei Barbets (ex-plaça Massena, a l'angle Avenguda Jean Médecin/Carriera Gioffredo), en l'onor de la nacion occitana que s'espandís de Mentan a Bordèu e de Lemosin ai Pireneus.

 

 

La República de Nissa se rajonharà tanben a-n-aquesta manifestacion nacionala.

 

Es lo Vau d'Aran (enclaus occitan de 10.000 estatjants que se tròba en Catalonha) qu'a instaurat aquesta fèsta nacionala, per fin d'onorar l'establiment en lo 1990 de son govèrn mièg-autonòm, que la lenga occitana es co-oficiala, estatut unic en Occitània tota (http://www.conselharan.org/).

 

Aquesta amassada sarà tanben l'escasença d'exprimir tornamai lo sosten de la Republica Federala Occitana a David Grosclaude, conselhier regional d'Aquitània e sòci dau Partit Occitan, en cauma de la fam despuei lo 27 de mai dau 2015 contra lo mesprètz de l'Estat francés devèrs la lenga occitana.

 

Perqué contrariament a Catalonha qu'a atribuït a l'occitan un estatut de lenga co-oficiala en Vau d'Aran, la situacion de l'occitan en França es de mai en mai perilhosa pendent que la pression estatala francesa es totjorn tant fòrta : abséncia d'estatut oficial, sota-representacion dins la vida publica, marridas volontats persistentas que penalisan son ensenhament.

 

Tot aquò pòu pas mai durar ! N'i a pron d'èstre mespresats ! 

  

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


La Republica Federala Occitana solidària de David GROSCLAUDE [Comunicat Oficiau]

28.05.2015

La Republica Federala Occitana manifesta sa solidaritat amb David GROSCLAUDE !

 

Lo conselhier regional d'Aquitània David GROSCLAUDE entamena uèi una cauma de la fam en signe de protèsta contra la politica lengüicida de l'Estat francés ! 

 

N'i a pron d'èstre mespresats !

 

   

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


Lo president de la República de Nissa empedit dai foarças de poliça d'ocupacion d'assistir a la commemoracion dau Genocidi Armèni [Comunicat dau President de la República de Nissa]

25.04.2015

 

 

Ier (24 d'abriu), la poliça nacionala francesa m'a empedit de portar li bandieras nissarda e occitana emé li bandieras armeniani.

 

 

Nissa a aculhit lu Armenians e mi pensi qu'es important d'èstre solidari dei pòbles que son amenaçats de moart. Ai deugut asperar emé 3 policiers la fin de la ceremonia per jónher d'amics armenians !

 

Cristòu DAURORE

President de la República de Nissa

 

***

  

REPUBLICA DE NISSA

6 Avenguda Gautier-Roux

OC – 06000 NISSA

Tel.: +33 (0)6 71 18 61 21

Corriel : occitania@nissa.org

Site : www.occitania-oc.com



La Republica Federala Occitana saluda la mobilizacion contra l'inauguracion de l'estèla a l'abat Grégoire [Comunicat Oficiau]

13.05.2015

La Republica Federala Occitana saluda la mobilizacion dei ciutadans occitans contra l'inauguracion de l'estèla de l'abat Grégoire a Montpelhièr.

 

Condemnam aquesta inauguracion que constitua una provocacion de la part de l'Estat francés. Per rapèl istoric, durant la Revolucion Francesa, l'abat Grégoire èra l'autor d'un rapòrt entitolat "La necessitat e lei mejans d'anientar lei patoés e d'universalizar l'usatge de la lenga francesa" qu'aviá per tòca de trobar lei metòds lei mai eficaces per leis eradicar.

   

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


La Republica Federala Occitana commemòra lo centenari dau Genocidi Armèni [Comunicat Oficial]

24.04.2015

 

La Republica Federala Occitana commemòra en aqueste jorn dau 24 d'abriu dau 2015 lo Centenari dau Genocidi Armèni.

 

Reconoissèm ansin que s'agís ben d'un genocidi, au contrari de çò que pretend la propaganda nacionalista turca que denega l'existéncia d'aqueste crimi contra l'umanitat.

 

Denembrèm pas leis autrei minoritats crestianas (siriacs, grecs pontics...) que foguèron tanben victimas de la folia genocidària que resultèt dau nacionalisme expancionista pan-turquista menat per lo poder criminal dei "Joves-Turcs" de l'Empèri Otoman.

 

 

Denembrèm pas nimai qu'èra pas lo promier còp que l'Empèri Otoman planificava un tau crimi de massa contra de la minoritat armènia. En lo 1895, pròche de 300.000 armènis foguèron tuats per lei otomans pendent lei "Chaples Amidians". En lo 1909, 30.000 armènis foguèron tuats per lei "Joves-Turcs" a-n-Adana, província de Cilicia.

 

Vergonha au nacionalisme turc e a l'Empèri Otoman que cometèron aqueste genocidi ! Vergonha a l'Estat turc que denega l'existéncia d'aqueste genocidi e qu'a totjorn mespresat lei minoritats non-turcas presentas sus  lo territòri qu'ocupa.

 

En lucha contra l'imperialisme de l'Estat francés e victima tanben d'un genocidi pendent la Crosada contra leis Albigés, la nacion occitana es naturalament solidària ambé la nacion armènia.

 

Viva la Solidaritat Occitano-Armènia !

 

  

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


La Republica Federala Occitana rendís omenatge ai victimas deis atemptats de París e contra lo jornau Charlie Hebdo [Comunicat Oficiau]

07.01.2015

 

 

La Republica Federala Occitana ten a rendre omenatge ai victimas de l'òrre atemptat comés aqueste matin dau 7 de genoier contra la redaccion dau jornal Charlie Hebdo, e condemna amb la mai granda vigor aquest acte ferotge e criminal qu'a per tòca d'assassinar la libertat d'expression e d'informacion.

 

 

Entra lei numerosas victimas d'aquela barbaria, dos au mens èran d'origina occitana : l'economista tolosan Bernat Marís e lo dessenhator Bernat Verlhac dich Tinhós.

 

La Republica Federala Occitana saluda la memòria de totei lei victimas d'aquest odiós atemptat e exprimís tota sa compassion ai sei familhas.

  

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com


Vots dau President de la Republica Federala Occitana per lo Novèl An 2015 [Comunicat Oficiau]

01.01.2015

 

Cari ciutadanas, cars ciutadans,

 

Aquest an, la Republica Federala Occitana a cambiat de president e siáu onorat d'èstre estat elejut per vautres. Tèni a rengraciar toi aquelu qu'an participat en aquesta votacion, perqu'es la voastra participacion que dona a la noastra república tota la sieu legitimitat. E rengraci toi aquelu que m'an chausit, en vos dient que mi mostrerai digne de la voastre fidança.

 

L'annada 2015 va començar e serà aquela dau novèu govèrn que Jonathan SANTILLI, lo novèu promier ministre qu'ai designat, si carguerà de metre en plaça. Un gran trabalh n'aspera per donar encara mai de pes a la noastra república, proclamada en lo 2007 per rapresentar e sièrver lu interés dau pòble occitan.

 

Enfin, rendi gràcia en toi aquelu que n'ajudon e que nos sostènon perqué motivats da la perspectiva d'un avenir milhor en l'encastre d'una república federala qu'assegurerà mai de democracia participativa e de governança locala sota la forma de republicas federadi qu'auràn un poder autonòm vertadier.

 

Boana Annada en toi e que l'An 2015 vos poarte bonur, jòia, succès e una excelenta sanitat !

  

Ciril JOANIN

President de la Republica Federala Occitana

  

***

  

Prètz, Larguesa e Paratge

 

 ***

  

REPUBLICA FEDERALA OCCITANA

Provença, OC – 84120 PERTUS

Tel.: +33 (0)6 46 62 74 93

Corriel : rfoccitana@gmail.com

Site : www.occitania-oc.com